Nagpaalim karon sa balay tambalanan ang usa ka 18-anyos nga lalaki human kini gitigbas sa iyang nakauban sa inom niadtong milabayng adlaw sa Sitio Maisa, Brgy. Cabadiangan, Lungsud sa Kadingilan.
Giila sa kapulisan ang suspek nga si alyas “Dagang”, nag-edad og 25 hangtod 30 anyos, samtang ang biktima nakaangkon og mga samad tinigbasan sa iyang wala nga bukton ug abaga.
Base sa imbestigasyon, nag-uban pa sa pag-inom ang biktima ug ang suspek sa maong dapit.
Apan sa dihang padulong na unta matulog ang biktima human sa ilang session, kalit lang kining gitigbas sa suspek sa makadaghang higayon gamit ang usa ka sanggot sa walay klarong rason.
Nakahimo pa sa pagdagan ang biktima aron mangayo og tabang ngadto sa mga rescue personnel sa Brgy. Cabadiangan, kinsa daling nagdala kaniya ngadto sa MDRRMO-Kadingilan.
Tungod sa kagrabe sa samad, gibalhin ang biktima ngadto sa Bukidnon Provincial Hospital sa Kibawe alang sa dugang nga operasyon.
Sa pagkakaron, ang suspek daling miikyas human sa insidente ug padayon pa kining gipangita sa kapulisan pinaagi sa gilusad nga hot pursuit operation.