Kinse ka senador ang nagpadayag og kabalak-an sa embahada sa China human sa mga kontrobersyal nga pamahayag niini batok sa pipila ka opisyal sa Pilipinas kabahin sa isyu sa West Philippine Sea.
Ang tensyon misugod sa dihang gisaway ni Sen. Francis Pangilinan ang military drills sa China sa palibot sa Taiwan. Samtang, nakadungag niini si Sen. Risa Hontiveros, human gitawag nga “bad guest” ang China sa diplomatic protest subay sa pamahayag ni Philippine Coast Guard West Philippine Sea Spokesman Commodore Jay Tarriela.
Bisan pa man nga kadaghanan sa Senado nagsuporta sa draft resolution, pipila ka senador ang nagpugong sa pag-aproba niini.
Gihisgutan nga ang uban sa kanila nagpakita og pro-China leanings, samtang ang uban nag-igmat sa tensyon tali sa Pilipinas ug Beijing ug gihunahuna lamang matud pa ang kahimtang sa mga OFW sa China, Hong Kong, ug Macau.
Subay niini, mipasaka si Sen. Imee Marcos og Senate Resolution 267 nga nag-awhag sa mga opisyal sa maayong diplomatikong pagpadayag ug pagtugyan sa Department of Foreign Affairs sa pagdumala sa mga diplomatic nga isyu.
Samtang si Sen. Erwin Tulfo, ang bag-ong chairman sa Senate Foreign Relations Committee, nagpadayon sa prinsipyo nga “friends to all, enemies to none” aron mapalig-on ang maayong relasyon sa China ug malikayan ang tensyon sa West Philippine Sea.