Nasunog ang usa ka dos andanas nga panimalay sa Barangay San Carlos, Valencia City, Bukidnon nga miresulta sa kamatayon sa usa ka 15-anyos nga batang lalaki, nga usa ka Person with Disability (PWD).
Sa pakighinabi sa Bombo Radyo Malaybalay kay FO1 Niko C. Puno, Fire and Arson Investigator sa BFP Valencia gibutyag niini, nga ang PWD nga biktima wala makagawas tungod sa iyang kakulang sa mobility, ug human sa sunog, nakaplagan ang iyang lawas duol sa pultahan, posible nga naningkamot pa kini nga mikamang aron makalingkawas sa sunog.
Gibanabanang adunay damyos nga moabot og ₱309,000 ang maong insidente.
Sumala ni Puno, wala pa matino ang hinungdan sa sunog ug padayon pa ang imbestigasyon.
Gumikan niini, gipahimangnoan sa BFP ang publiko nga magmatngon sa paggamit sa kuryente ug mga appliances, labi na karong Marso nga Fire Prevention Month.
Gi-awhag usab nila ang tanan nga sa panahon sa emerhensiya, tawagan dayon ang BFP kaysa mag-post sa social media.