12 ka tonelada sa chocolate bars sa Europe, gidagit sa kawatan! 

Moabot sa 12 tonelada sa KitKat chocolate bars ang nahanaw sa Europe human gikatahong gidagit sa mga mangingilad ang truck nga nagkarga niini, sumala sa Swiss food giant nga Nestle.

Gibanabana-banaang mukabat sa 413,793 ka buok nga chocolate bars sa bag-ong produkto ang karga sa maong truck gikan sa Central Italy paingon unta sa nagkadaiyang dapit sa Europe.

Apan wala na kini makaabot sa nasud sa Poland nga mao unta ang katapusan niining scheduled destination.

Hinuon, gipasalig sa KitKat nga daling ma-trace o masubay ang maong mga nahanaw nga produkto pinaagi sa ilang unique batch code. Padayon pa karun ang gihimong imbestigasyon sa mga awtoridad aron mailhan ang mga responsable ug mabawi ang kinawat nga mga produkto.