Malampusong gibungkag sa mga otoridad pinaagi sa pag-ibot ug pagsunog sa liboan ka mga punuan nga plantasyon sa Marijuana sa usa ka hilit nga lugar sa lungsod Cabanglasan, Bukidnon.
Sa inisyal nga imbestigasyon, giingong gipanag-iyahan ang plantasyon sa usa ka alyas “Boy,” residente sa Cabanglasan, nga anaa pa sa pagpanago.
Ang mga tanom nga marijuana gibana-bana og lima (5) ka pye ang gitas-on matag usa ug adunay kinatibuk-ang balor nga ₱200,000.
Sa pakighinabi sa Bombo Radyo Malaybalay kay PCpt. Sheila Joy P. Jangad, tigpamaba sa Bukidnon Police Provincial Office, nahitabo ang marijuana eradication operation takna alas 6:30 sa buntag niadtong milabayng adlaw diin gipang-ibot ang tanom nga may gilapdong kapin 500 square meters.
Nakumpiska sa mga otoridad ang kapin 1,000 ka fully grown marijuana hills nga may gitas-on nga 5 feet matag usa.
Gilaglag dayon pinaagi sa pagsunog sa lugar ang tanang narekober nga tanom samtang adunay mga sample nga ipadala sa PNP Provincial Forensic Unit sa Malaybalay City alang sa eksaminasyon sa laboratoryo.
Sa pagkakaron giandam na ang pagpasaka ang kasong paglapas sa Section 16 sa R.A. 9165 batok sa responsable.
Sa pagkakron ppadayon ang pagpangita sa suspetsado samtang gipakusgan sa kapulisan ang monitoring sa kabukiran sa Bukidnon aron mapugngan ang pagbalik sa ilegal nga pagtanom og marijuana sa probinsya.