Usa ka tawo ang namatay ug laing 23 ang naangol atol sa walay hunong nga drone attack batok sa kapital sa Ukraine gikan sa Russia. Sumala sa mga opisyal sa Ukraine, kapin sa 550 ka drones ug 11 ka misil ang gilusad sulod sa pito ka oras nga pagpamomba.
Nasayran nga 40 ka balay nga gipuy-an sa mga tawo, usa ka eskwelahan, ug daghang mga imprastruktura ang nadaot ug nasunog.
Gitawag sa gobyerno sa Ukraine kini nga usa ka buhat sa terorismo. Samtang naghangyo ang Presidente sa Ukraine sa tabang lakip ang suporta aron makapalit sa mas lig-on ug bag-ong air defense system. Ang maong insidente nagpasabot lamang sa padayon nga hulga sa seguridad ug kalinaw sa Ukraine.
Nagpangayo kini og dali nga aksyon gikan sa internasyonal nga komunidad aron mapugngan ang sunod pa nga mga atake ug maprotektahan ang kinabuhi sa mga sibilyan.