Gitangtang sa serbisyo ang 19 ka mga empleyado sa lokal nga Kagamhanan sa Malaybalay, human sa resulta sa gipahigayong mandatory drug testing isip kabahin sa mga requirements sa renewal sa ilang kontrata.
Sa maong ihap, siyam ka mga Job Order employees ang nagpositibo sa illegal nga droga, samtang napulo ka empleyado ang wala mitunga sa nahisgutang testing, hinungdan nga wala na kini giapil sa pag-renew sa kontrata.
Sa eksklusibong pakighinabi sa Bombo Radyo Malaybalay kay City Mayor Jay Warren Pabillaran nga adunay protokol ang syudad nga ipailawom sa mandatory drug testing ang tanang JO ug casual employees matag mahuman ang ilang kontrata.
Gipasabot sa Human Resource Management Office nga ang dili pagpakita sa drug test, ug positibong resulta, base sa polisiya, awtomatikong moresulta sa pagtangtang o dili pag-renew sa ilang serbisyo.
Kini nga lakang kabahin sa padayon nga kampanya sa lokal nga paggamhanan batok sa iligal nga droga ug aron masiguro nga drug free workplace ang tanang buhatan sa syudad.