Mikabat sa kapin ₱1.2 milyon ang kinatibuk-ang danyos nga narekord sa 18 ka mga insidente sa sunog sa probinsya sa Bukidnon sulod lamang sa bulan sa Enero 2026.
Sa eksklusibong pakighinabi sa Bombo Radyo kay SFO1 Marvin G. Talibong, OIC sa Intelligence and Investigation Section sa BFP Bukidnon nga kadaghanan sa mga insidente nahitabo sa mga residential area.
Gibutyag niini nga ang nag-unang hinungdan sa mga sunog mao ang mga electrical appliances nga nabiyaan nga nakaandar, ingon man ang open flame gikan sa pagluto gamit ang kahoy.
Matud pa sa BFP, ang mga dakbayan sa Malaybalay ug Valencia maoy nakatala sa pinakadaghan nga ihap sa sunog sa tibuok probinsya.
Taliwala sa nagsingabot nga Fire Prevention Month karong Marso, nanawagan si Talibong sa publiko nga magmabinantayon ug mahimong responsable sa ilang mga panimalay.